احادیث نبوی کے چھوٹے بڑے بہت سے مجموعے مختلف زبانوں میں پائے جاتے ہیں – ایک مجموعہ ڈاکٹر خلیل الرحمٰن چشتی نے مرتّب کیا ہے ، جسے جناب محمد افضل لون (ملت پبلی کیشنز ، سری نگر کشمیر) نے چھاپا ہے – یہ مجموعہ متعدد خصوصیات رکھتا ہے –
ڈاکٹر خلیل الرحمٰن چشتی پاکستان کے معروف صاحبِ قلم ہیں – ان کی تصانیف سے پوری دنیا میں فائدہ اٹھایا جارہا ہے – اس کے علاوہ وہ اپنی تقریروں اور دروس کے ذریعے پاکستان اور دیگر ممالک ، خاص طور پر کینیڈا میں فیض پہنچا رہے ہیں – ان کا ایک وسیع حلقہ ہے – قرآنیات اور علوم الحدیث کے موضوعات پر ان کی قابل قدر تصانیف ہیں ، مثلاً درسِ قرآن کی تیاری کیسے کریں؟ قرآنی سورتوں کا نظمِ جلی ، سورۂ یٰسین ، اصولِ تفسیر ، انفاق فی سبیل اللہ ، تزکیۂ نفس ، حدیث کی اہمیت و ضرورت ، قواعدِ زبان عربی (دو جلدیں) وغیرہ – ان کا انداز تدریسی ہے – وہ دقیق مضامین بھی اس طرح بیان کرتے ہیں کہ ہر سطح کے قاری اور سامع کے ذہن نشین ہوجاتا ہے – انھوں نے الفوز اکیڈمی قائم کررکھی ہے ، جس کے تحت دینی ، علمی اور اصلاحی سرگرمیاں انجام دیتے ہیں –
زیرِ نظر مجموعۂ احادیث انھوں نے اصلاً الفوز اکیڈمی کے مختلف کورسز میں شریک ہونے والوں کے لیے تیار کیا ہے ، تاکہ وہ تہجد اور فجر کی نمازوں کے دوران انہیں یاد کرلیں – اس میں عقائد و ایمانیات ، عبادات ، اخلاقیات ، معاشرت ، معاملات ، سیاسیات ، حلال و حرام جیسے مضامین کا احاطہ کیا گیا ہے – ہر موضوع پر عموماً پانچ احادیث دی گئی ہیں – مختصر احادیث کا انتخاب کیا گیا ہے ، تاکہ انہیں یاد کرنے میں آسانی ہو – زیادہ تر احادیث پر عنوان لگایا گیا ہے ، تاکہ انہیں سمجھنے میں آسانی ہو – احادیث کے مکمل حوالے دیے گئے ہیں اور صرف صحیح احادیث درج کی گئی ہیں ، ضعیف احادیث سے اجتناب کیا گیا ہے –
یہ مجموعہ پانچ سو تیئس (523) احادیث پر مشتمل ہے – اس میں احادیث کے عربی متن کے ساتھ اردو اور انگریزی ترجمہ بھی دیا گیا ہے – انگریزی ترجمہ پروفیسر حبیب الرحمٰن قاضی کا ہے –
قوی امید ہے کہ اس کتاب کو قبول عام حاصل ہوگا اور دینی حلقے اپنی تربیت کے لیے اس سے بھرپور فائدہ اٹھائیں گے – احادیث کو بھی حفظ کرنے کا اہتمام کرنا چاہیے – اس سلسلے میں یہ کتاب معاون ثابت ہوگی
محمد رضی الاسلام ندوی
