اس سے پہلے میں نے غلام رسول مہر کی کوئی کتاب نہیں پڑھی، یہ ان سے میرا پہلا تعارف ہے۔ اور بے شک اسلام کی اس وسیع تاریخ سے میری واقفیت اس کتاب سے ہی ہوئی ہے۔
زیرِ تبصرہ کتاب مختصر تاریخ اسلام، اسلامی تاریخ کا ایک مختصر جائزہ فراہم کرتی ہے۔ اس کتاب میں بہت کم صفحات میں اسلامی تاریخ کا ایک بہت بڑا حصہ قاری تک پہنچانے کا کام سرانجام دیا گیا ہے۔ یہ کتاب ان لوگوں کے لئے ایک بہت بہترین ذریعہ ہے جو اسلامی تاریخ کو کم وقت میں جاننا چاہتے ہیں۔ بلاشبہ اسلامی تاریخ دوسری قوموں کی تاریخ سے بہت روشن اور وسیع ہے۔
اس کتاب میں آپ کو مختلف ملکوں کی مختلف تہذیبوں سے لے کر ان کے پرانے نام، جو بعد میں بدل کر کچھ اور کر دیے گئے، جاننے کو ملیں گے۔ کتاب میں کل 58 باب ہیں۔ ان 58 ابواب میں مصر سے مکہ، مکہ سے اندلس اور اندلس سے انڈونیشیا تک کی تاریخ کو واضح کر دیا گیا ہے، جس میں مسلمانوں کے زوال سے لے کر عروج تک کی تاریخ کو دکھایا گیا ہے۔
پہلے مصر کا تعارف، اس کے سماجی، سیاسی اور مذہبی حالات بیان کیے گئے ہیں۔
اسلام سے پہلے عرب کے حالات، عرب کا نظام زندگی، قریش کے مختلف خاندانوں کے بارے میں آپ کو جاننے کو ملے گا۔ جس میں آپ ﷺ کی ولادت سے لے کر وفات تک کی زندگی، نبوت سے پہلے اور نبوت کے بعد کی زندگی کے موضوعات کو شامل کیا گیا ہے۔ خلافت صدیق سے لے کر خلافت حسنؓ کا دورِ خلافت، خلافتِ راشدہ کے بعد قیصر و کسریٰ کے دور پر بھی روشنی ڈالی گئی ہے۔ بنی امیہ کی حکومت میں سماجی اور سیاسی زندگی، بنی عباس کے دورِ حکومت میں عباسیوں کے عروج سے لے کر زوال تک کے موضوعات کو شامل کیا گیا ہے, فتح اندلس سے انڈونیشیا کی آزادی تک۔
Reviews
There are no reviews yet.