میاں نذیر حسین محدث دہلوی رحمۃ اللہ علیہ کی قدیم ترین مفصل سوانح عمری جسے میاں صاحب ہی کے ایک شاگرد مولانا فضل حسین بہاری نے الحیاۃبعد المماۃ کے نام سے لکھا تھا اور جس کے اب تک متعدد ایڈیشن ہندو پاک میں شائع ہوچکے ہیں، حال میں دار ابی الطیب گوجرانوالہ کی جانب سے اس کتاب کا نیا ایڈیشن منظر عام پر آیا ہے.
اس ایڈیشن کی اہم خصوصیت یہ ہے کہ معروف اسلامی اسکالر اور محقق محترم محمد تنزیل صدیقی کے مراجعہ اور تحشیہ کے ساتھ شائع ہوا ہے جس سے اس کی افادیت دوچند ہوگئی ہے.
ہندوستان میں اس نئے ایڈیشن کی اشاعت کا سہرا الدار الاثریہ نئی دہلی کے سر بندھا ہے، محترم شیخ عارف جاوید محمدی حفظہ اللہ کی توجہ سے اسی ہندوستانی اشاعت کا ایک نسخہ راقم کو بھی موصول ہوا ہے. راقم کی لائبریری میں الحیاۃبعد المماۃ کا وہ نسخہ پہلے سے موجود ہے جو الکتاب انٹر نیشنل دہلی سے شائع ہوا تھا اور اسی نسخے سے آج سے تقریباً دس سال پہلے کتاب کو ایک ختم پڑھ چکا تھا. لیکن کتاب کے اس نئے اور تحقیق شدہ ایڈیشن کو دیکھ کر دوبارہ مطالعہ کی خواہش ہورہی ہے.