امام حسن البنا شہید اپنی ذات میں ایک امت
مصنف: ڈاکٹر توفیق الواعی
مترجم: ڈاکٹر عبد الحمید اطہر ندوی
امام حسن البنّا کی شخصیت اور فکر پر المنار پبلشنگ ھاؤس نئی دہلی کی شائع کردہ کتاب ‘امام حسن البنّا – اپنی ذات میں ایک امّت’ پاکر بہت خوشی ہوئی- میرا خیال ہے کہ حسن البنّا عالمی سطح پر بیسویں صدی عیسوی کی سب سے طاقت ور شخصیت کے مالک تھے- ان کی قائم کردہ تحریک ‘الإخوان المسلمون’ نے نہ صرف مصر اور عالم عرب ، بلکہ پوری دنیا میں گہرے اثرات مرتّب کیے ہیں- احیائے اسلام کے لیے کام کرنے والی دوسری تحریکوں کے کارکنوں اور وابستگان نے اخوان کی فکر سے تحریک اور جذبہ پایا ہے- اخوانی رہ نماؤں کے تیار کردہ لٹریچر کا دیگر زبانوں میں ترجمہ ہوا ہے اور بڑے پیمانے پر اس سے استفادہ کیا جارہا ہے-
اخوان اور اس کے بانی حسن البنّا کی شخصیت ، افکار اور خدمات پر بہت سی کتابیں لکھی گئی ہیں- زیرِ نظر کتاب عالم اسلام کے معروف مصنف ڈاکٹر توفیق الواعی (1930- 2019) کی تصنیف کردہ ہے- موصوف اخوان کے مشہور داعیوں میں سے تھے- کویت میں علمی، تصنیفی اور تحقیقی کاموں میں مصروف رہے- موسوعۃ الفقہ الاسلامی مصر اور الموسوعۃ الفقہیۃ کویت کی تیاری میں شریک رہے- آپ کی مطبوعہ کتابوں کی تعداد چالیس ہے- ان کے علاوہ بہت سی کتابیں ابھی طبع نہیں ہوسکی ہیں- ‘حسن البنا مجدد القرن، رجل فی امۃ و امۃ فی رجل’ ان کی اہم تالیف ہے ، جس میں انھوں نے بانی تحریک کا بہت مفصل تعارف کرایا ہے-
اس کتاب کا اردو ترجمہ بھٹکل کے معروف مصنف و مترجم مولانا عبد الحمید اطہر ندوی نے کیا ہے- موصوف بہت مشّاق مترجم ہیں- بہت سی کتابوں کا اردو ترجمہ کرچکے ہیں- اس کی اشاعت المنار پبلشنگ ھاؤس نئی دہلی سے ہوئی ہے- جناب محمد خالد اعظمی علم دوست شخصیت کے مالک ہیں- خود بھی صاحب تصنیف ہیں اور اپنے اس اشاعتی ادارہ کے ذریعے عربی زبان کی نئی علمی کتابوں کا ترجمہ کرواکے اردو خواں شائقین تک پہنچاتے رہتے ہیں-
محمد رضی الاسلام ندوی
