آزادی کے بعد جن سنجیدہ ادیبوں نے تحقیق و تنقید کی طرف خصوصی توجہ دی ان میں پروفیسر محمود الٰہی کا نام قابل ذکر ہے۔ پروفیسر محمود الہٰی تمام زندگی درس و تدریس اور تحقیق و تنقید میں مشغول رہے۔ انھوں نے اردو کی بہت سی گم شدہ چیزوں کو انتہائی تحقیق کے بعد اربابِ ادب کے سامنے پیش کیا۔ اس کے علاوہ گورکھپور یونی ورسٹی میں شعبۂ اردو کے قیام میں انھوں نے ایک اہم کردار ادا کیا۔ ان کی ادبی خدمات کو اردو ادب کی تاریخ کبھی فراموش نہیں کرسکتی۔